الحياة لو لعبة

الحياة لو لعبة كنت قفلتها.

ده اللي بعمله بقى لي فترة فعلًا، بحاول أقفل اللعبة اللي أنا فيها.

حياتي الفترة اللي فاتت كانت أشبه ببازل قطعها متفرقة،

كل قطعة في ناحية، وفي قطع ضايعة.

اللي كنت بعمله بقى لي مدة -من غير ما آخد بالي- إني بجمع القطع المنثورة هنا وهنا،

بحاول أكون صورة لحياتي، صورة أرضى عنها.

الموضوع مكنش بسيط، ولا سهل.

القطعة دي هنا، ودي هناك، أيوه كدا صح.

أوباااا في قطعة مفقودة، راحت فين ؟!                                                 

خلاص مش مهم دلوقتي القطعة المفقودة، أكيد هتظهر لي قدام، خليني أركز في الموجود.

طيب في قطعة قدامي آهو، وأنا عارفة مكانها الصحيح، بس مش قادرة أرجعها لمكانها !

مفيش حاجة اسمها مش قادرة، اتحملي أي صعوبة ورجعيها؛ علشان الصورة تكمل.

اللي اتشكل من الصورة لحد دلوقتي؛ بيأكد إنها صورة جميلة،

والجمال يستاهل التعب، الجمال عايز معافرة.

طيب والقطعة المفقودة ؟!

مش لازم تلاقيها دلوقتي،

يمكن لازم تكملي الصورة كلها الأول؛ علشان القطعة دي تظهر !

وإنتِ عارفة إنها مش أي قطعة، دي درة التاج.

اصنعي تاجك الأول يا لقاء، ووقتها ربنا هيهدي لك الدرة :)