الأيام الصعبة ستمر ..
جملة كل شوية بتتردد جوايا
علشان تسكت صوت الوجع شوية
علشان تطمني إنه ماشي قريب
و إنه مهما زاد هيقل
هيقل لحد ما يختفي.
الأيام الصعبة ستمر ..
الجرح المفتوح المتعري
اللي كل شوية هوا الذكريات يخبط فيه فيألمني
هيلم .. و هيبطل يكون ألمي.
الأيام الصعبة ستمر ..
الحدوتة الحاضرة بقوة .. هتنسحب
و الأفكار اللي شاغلة دماغي
هتيجي بدالها أفكار تانية
و مسير النار أكيد هتنطفي.
الأيام الصعبة ستمر ..
أصل مفيش حاجة بتفضل على حالها
التغيير سنة الحياة
ليه أستسلم قدام نهاية ؟!
النهاية بشكل ما بتكون بداية جديدة ..
الأيام الصعبة ستمر ..
و هتيجي أيام حلوة
و بردو هتيجي أيام أصعب
بس هتعدي
و هأستحملها لحد ما تعدي
أصل دي فايدة الوجع
بيكبرني ..
و بيأهلني لتحمل أكبر.
الأيام الصعبة ستمر ..
فلازم أطمن
و أما الخوف مني يتمكن
ماليش غير إني أحضن نفسي
و أفكرها إن الأيام الصعبة هتمر.
عنوان مقال قرأته على موقع نون من فترة
ما أعتقدش إني فاكرة محتوى المقال قوي،
بس العنوان مش بيفارقني خالص ..
و دي حاجة لطيفة يعني :)
شكرًا سارة عابدين
No comments:
Post a Comment